ލޯކަލް ގަވަރމަންޓް އޮތޯރިޓީ (އެލް.ޖީ.އޭ)، މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސް އަދި ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ (އެން.ސީ.އައި.ޓީ) ގުޅިގެން ކުރިޔަށް ގެންދިޔަ "ޖެމްސް ވާކްސްޕޭސް އާއި މައިކްރޮސޮފްޓް-365ގެ މުދައްރިބުން ތަމްރީނުކުރުމުގެ ޕްރޮގްރާމް"  ކާމިޔާބު ކަމާއެކު ނިންމާލައިފިއެވެ. މި ޕްރޮގްރާމް ކުރިޔަށް ދިޔައީ 2025 މޭ 20 އިން 22 އަށް މާލޭގެ އެން.ސީ.އައި.ޓީގެ އޮޑިޓޯރިއަމްގައެވެ.

މި ޕްރޮގްރާމްގެ މައިގަނޑު މަޤްޞަދަކީ މައިކްރޮސޮފްޓް-365 އަދި އެން.ސީ.އައި.ޓީން ތައްޔާރުކޮށްފައިވާ ޖެމްސް ވާކްސްޕޭސް ބޭނުންކޮށްގެން ކައުންސިލްތަކުގެ އިދާރީ ކަންކަން ހަރުދަނާކޮށް ބަލަހައްޓާނެ ގޮތް ކިޔައިދީ، އެ މަޢުލޫމާތު އެހެން ކައުންސިލްތަކުގެ މެންބަރުންނާއި މުވައްޒަފުންނަށް ފޯރުކޮށްދޭނެ ގޮތް މުދައްރިބުންނަށް ދަސްކޮށްދިނުމެވެ.

މިތަމްރީނުގެ ބައިވެރިންނަށް މައިކްރޮސޮފްޓް-365ގެ އެޕްލިކޭޝަންތަކުގެ އެހީގައި އިދާރީ ކަންކަން ހަރުދަނާ ކުރާނެ ގޮތާއި، ޖެމްސް ވާކްސްޕޭސް ބޭނުންކުރާނެ ގޮތުގެ އިތުރުން މި މަޢުލޫމާތުތައް އެހެން ކައުންސިލްތަކަށް ފޯރުކޮށްދޭނެ ގޮތުގެ ސެޝަންތައް ނަގައިދެވިފައިވެއެވެ. އަދި މީގެ އިތުރުން މައިކްރޮސޮފްޓް-365ގެ އެޕްލިކޭޝަންތައް ފުރިހަމަ ގޮތުގައި ބޭނުންކުރަން ފެށުމަށް އިދާރީގޮތުން ކުރަން ހުރި ކަންކަން ހިމެނޭ ޕްލޭނެއް އެކުލަވާލެވިގެން ދިޔައެވެ.

ތިން ދުވަހުގެ މުއްދަތަށް ކުރިއަށް ދިޔަ މި ތަމްރީނުގައި އަތޮޅު ކައުންސިލްތަކުން 32 ފަރާތަކާއި، ސިޓީ ކައުންސިލްތަކުން 9 ފަރާތެއް އަދި އެލްޖީއޭގެ 4 މުވައްޒަފެއް ވަނީ ބައިވެރިވެފައެވެ. އަދި ތަމްރީނު ނިންމާލުމުގެ ރަސްމިއްޔާތެއް ބާއްވައި، ތަމްރީނުގެ ބައިވެރިންނަށް ސެޓްފިކެޓް ވަނީ ހަވާލު ކުރެވިފައެވެ.